Ma Giesù Sarbaturi 'stu paisi 'un viriti
ca puru quannu chiovi jè muortu ri siti
a ssiccu jeni tuttu ra Ruocca a Marina
s'arriva 'na vuccia jè cuomu 'a sintina.
I turisti c'arrivinu su' ppriestu abbrunzati
puru 'nta ll'ummira si ccu st'acqua lavati;
Maruonna ri Tindiri arrispunnimi allura:
ti lavasti 'nta st'acqui puru tu mè Signura?
O Matruzza Santa ri la Chiesa Catina
pi uoggi e pi ssiempi vui tinitila china
la buonza vicinu a Spinuzza mpustata
cu nna cura ri gienti ri jacqua assitata.
San Vicienzu ri Paula i tiesti tu cuonza
a cchissi ca l'acqua purtaru 'nta buonza
e siddu 'un s'alliestinu a canciari li tubi
ci rumpiti a carina siddu fannu li furbi.
Ma giustu vi pari o San Giacuminu
ca nn'appi a tuccari 'stu malu ristinu,
ca pi nnovi misi 'nta ll'acqua natamu
e po' cent'anni senz'acqua campamu?
O Sant'Antuninu ma 'un vi nn'addunati
ca puru i panittiera sunnu tutti scantati
quannu niescinu 'u pani culuri r'a tierra
cuomu quann'ierimu 'n tiempu ri vierra.
O San Franciscu vi fazzu jò un vuotu
viegnu jò 'n Chiesa 'n piruni o a nuotu
si quantu cchiù priestu ra sira a matina
mannati tant'acqua e mi jncu a piscina.
O San Binirittu, vui patruzzu amurusu
truvatini un sinnicu mienu ruci ri musu,
chi fà picca pruclami, cchiù capaci ri fari
e 'un fà u beddu ri chiazza o mpillicciari.
Ma picchì nn'abbannuni tu Matri Rusariu
s'un viri a ca stamu passannu un carvariu,
'un si fà lu tò muonimu nnè cauru o friddu
si ll'acqua nn'arriva quant'un filu capiddu.
Jò vi suppricu allura a vui Santu Caliddu
priestu jtici 'n suonnu a ll'amicu Sariddu,
ma picchì … criritimi, 'un si nni pò cchiù
'ntra caputi e bagnieri cuomu fannu i zulù.
Vui trasitici 'n tiesta Santi Marcu e Binignu
e mmittitila a ppuostu 'sta campana ri lignu,
si pigghia a spata ri punta ci calati a curiera
pò a Carrapipi mannatilu pi finiri a carriera.
Tu u viristi o San Vitu ca 'n via Burdunaru
cu granni surprisa i tubi antichi attruvaru;
cunvucaru li spierti: ma chi gran raritati!!
arricampatili subitu e 'nto Museju i purtati.
Ascutatimi uora puru vui o San Crispinu
'nte cannuola o Cumuni facci niesciri vinu
r'accussì cuomu i signi tu li fai 'mbriacari
sinu a quannu cumincinu i tubi a canciari.
San Nicuola ri Bari jò vi ricu nna missa
cu pattu ca chissu 'un nni pigghia pi fissa
chi canta 'gni gh'juornu e puru nna suona
'nt'aricchi stanchi 'sta viecchia ciantuona.
Vacci rintra 'ssa tiesta tu Matri r'u Lumi
'un ci fari nsunsari puru l'acqua r'u ciumi;
o Santi Paulu e Pietru, si amurusi vui siti,
cchiù jttamu riavuli e cchiù vui 'un sintiti.
Jò quannu cci piensu o Santu Giluormu
cu ll'uocchi apierti 'gni nuotti jò ruormu
ca siddu m'avissi a sgrasciari 'u lurdumi
cu sapuni 'n pietra m'à llavari 'nto ciumi.
'Nta ll'artaru mi miettu jò a dinucchiuni
siddu l'acqua abbunnati o Santu Simuni,
uncà 'un nnu viriti ri cuomu mi la liccu
ca la facci e li manu mi lavu jò a ssiccu.
Tanta fuorza vui ratini o Santu Fulippu
c'accussì jennu avanti faciemu lu lippu,
viriti ri fari sienza scuonzu e nnè dannu
macari chiuoviri rieci misi 'nto 'n annu.
Prieju a tjà c'un succieri o San Furtunatu
ri lassarimi arrieri tuttu a mjà nsapunatu
quannu m'arrifriscu jò sutta a la duoccia
e p'un annu 'ntieru t'addumu nna tuorcia.
Cca siemu arriddutti uoramai tutti quanti
a ca 'un c'jeni juornu c'un priamu li Santi:
smuvitivi allura e pigghiati un marruggiu
e tant'acqua putabili mannatini a rruggiu.
Cu San Cuosimu 'nsiemi o San Damianu
'nta tiesta passatici 'a vuostra santa manu
a cu uora vulissi pigghiari a mmuzzicuna
ddì nuostri amicuzzi Pippuzzu e Simuna.
E mittitici vui, vi prieju jò San Pasquali
rintra 'ssa tistuzza nn'anticchiedda ri sali,
cummincitilu allura ca 'un si nni pò cchiù
r'ogni cuosa sbagghiari e mai sapiri cu fù.
Vi mprummiettu jò allura o San Micuzzu
ca si pigghiu lu tiernu mi scavu lu puzzu;
l'aviti a ccapiri puru vui Sant'Ambruociu
ca siddu mi lavu nnè manciu nnè cuociu.
O Matri Mmaculata ri tutti nui prutittici,
prutiggiti r'ogni dannu vui la mè lavatrici
ca ogni fini lavaggiu jncu nna caddariella
ri mpastu e 'nte mura ci passu jò a sniella.
Allustru l'artaru siempi a vui San Nicuola
si r'i mastri r'acqua cca mittiti nna scuola,
nvieci ri rumpiri accussì pietri cu magghiu
sicuru pi siempi ccà aviemu un travagghiu.
O San Giulianu, cuomu jera siempi chinu
nsinu ò vuorru 'u gibbiuni a Cruci Parrinu,
a mmjà uora mi pari, ca taliannu mi scantu,
cchù ssiccu r'u fuonti p'u Vienniri 'e Santu.
O Santa Luciuzza, ma u facisti annurbari?
si mancu cchiù i manu nni putiemu lavari,
e mientri passinu i juorna priannu li Santi
và vinniennu iddu siempi cannistri vacanti.
Mmiraculusa o vui Matri r'a Gibulimanna
'n tutti i casi ri jacqua un filiddu tu manna,
'nte strati e 'nte chiazzi c'jeni lu maravagnu
aunni i surci 'n custumi si fannu lu bagnu.
O Matri r'u Carminu, a ffuorza r'assuppari
'nta Nuova Zilanda st'acqui jeru assumari,
ma lu sinnicu pari, ca p'un nni fari allagari
già un mose urdinò pi tutti st'acqui firmari.
Già ri Musca arrivaru e di tutta l'Armienia
i russi a fari i bagni 'nta ll'acqua r'a sienia,
taliò San Basiliu puoi a lu sinnicu nuostru:
ma picchì javi dda facci culuri 'i culuostru?
Ri tutti 'sti cuosi nni parraru 'n Cunsigghiu
e di rintra u cilintru niscieru un cunigghiu:
cunsiddiratu e vistu ca jeni ccà tuttu guastu
assittativi cuommiri e faciemu un rimpastu.