- Ohh!!! 'un si nni pò cchiù, ma sulu parrari sapiti fari?
- Nnirjà, cuomu vuosi Djò t'arruspigghiasti?
- Ma picchì ti cririevi c'à rurmutu? Jera … nn'aria nn'aria, cu 'stu ciuciulizzu chi c'è!
- Tu nni vulissi far'accririri ca jeri vichianti, 'un ti nn'addunatu ca i filinij ti stannu cummigghiannu l'uocchi … e ggh'jeni 'u scieccu, ogni tantu cala e gh'jsa 'a tiesta!
- Ciesiri, ma r'accussì s'arragiuna, tu chi dici? 'un gn'jeni mancanza ri rispiettu?
- Nnirjà, 'un ti nni ncarricari … 'un nnu viri ca cca rintra uoramai addimintò cuomu ncapu 'a navi ri Francischiellu, cu si susi primu 'a matina cumanna e dietta liggi, 'un ti cci appricari, tu 'un nnu sai ca Rricu jè anticchia stuzzijusieddu, nne ca u fà pi mali … 'a tiesta! chi ci vò fari, chiddu si scapriccia r'accussì, cu nienti cierti vuoti!
- Ciesiri, m'à scusari … pò jessiri ca hai ragiuni tu, ma jò ricu ca Rricu uoramai viri filinij a tutti i banni, 'un si nn'adduna ca javi già un principiu ri catarratta? quannu si spitticchia l'uocchi pi squatrari i fimmini, 'un nni viri filinij??
- Ma santu riavuluni, siempi ri 'sti minchiati aviti a parrari? si viri ca vi spieccia! pi fuorza m'aviti a fari parrari à papanisca! 'ncà jò ricu: a Jsiniellu e a Cierda jannu i piscini olimpionichi, a Puoddina ficiru 'u fiestival r'u cinima ca ci mancava sulu a prisienza ri Putin, a Campufilici ficiru chiddu musicali, i lascaruoti 'un sulu ca zittu tu e zittu jò si 'nnauguraru 'u museju palantulogicu ma 'nsiemi é rattaluci si stannu aiutannu chi manu e chi pieri, a Castieddubuonu ò museju 'un ci puonnu cchiù rari mmattu, a Ghiraci stannu mannannu l'acqua minirali puru ncapu a Luna, a Santu Mauru già arrustinu cuosti e sosizza c'u mitanu, a Ganci rapieru nna scuola pi sinnici, 'nte Pietralì fannu piennuli ri cascavaddu quantu chiddi r'a Minniruossi, ri Nicusjà, vo ddiri ri nautru munnu! nni manninu puru 'u pani, cuomu a ddiri … tè! manciati, ca mancu chissu sapiti fari!! e ccà a Cifalù chi faciemu? pittirriari … pittirriari siempi! uncà 'u Mantralisca u lassaru apiertu juornu e nuotti e 'un si vitti mancu n'arma … ci mancò sulu ca cci appinnievinu 'a spuogghia ri cipudda, r'accussì nni putievinu sputtiri miegghiu, picchì jera 'a prova 'ncunfutabili ca pittirriamu pi ddavieru … e uora, a vuliti sientiri l'ultima? jeni frisca frisca ri 'sta matina.
- Nicuola, a mjà 'un m'u lieva nuddu r'a tiesta ca tu, cu rispiettu parrannu, o sini fattucchiaru o puru sini cu cappaggibbì, 'un pò jessiri mai ca 'sti scuppi l'aviemu a sientiri siempi ri tjà!
- Ma siddu c'jeni un ruspigghiu! 'un si parra r'autru 'n tuttu 'u paisi e puoi, a Villa … 'u sapiti quantu cuosi si sientinu! nienti ri mienu fui scrittu puru 'nto calannariu ri fistiggiamienti estivi, puru picchì jò sacciu ca ci fuoru fuorti prissioni, a fini – 'n uordini ri 'mpurtanza – appiru a scancillari 'a fiesta r'u gilatu, picchì 'un ci capieva cchiù nienti, arruspigghiativi!! … pari ca jò m'arrifardiassi.
- Amunì, lievini 'stu pulici ri 'n tiesta, annachiti e 'un allungari siempi 'u bruoru ò suolitu tjò.
- E allura, s'un vuliti aspittari 'u cumunicatu ufficiali 'nta faccibbuk, affilativi aricchi picchì u gn'jeni nutizia jamu jamu … cca pari ca 'nvintaru un sistiema 'nnuvativu r'ultima ginirazioni p'arricuogghiri i muzzuna, i vummi miricani … a mjà mi soddispiaci nna cuosa sula, quannu i criticati siempi riciennu ca quarijnu i sieggi tuttu l'annu! macari i quariassiru tuttu l'annu, già fussi coccuosa!
- Viriti!! viriti!!! 'nca jò m'avissi jucatu l'arma … nn'aviemu a fari sputtiri puru ri puddiniti ca 'nsina avantieri purtavinu 'u panaru cu ll'ova 'n tiesta … e fannu buonu si nni sputtinu; iddi fannu 'u tiatru a ll'apiertu e nuautri ca l'aviemu puru, ci pasciemu piecuri e crapi; iddi fannu 'a ddiffirinziata ca, sienza saggirari, ti spartinu puru 'u filu ri capiddu nivuru cu chiddu biunnu e nuautri ca razia a Djò 'a munnizza l'aviemu avutu siempi abbunnanti, 'un aviemu saputu mai apprufittari e arristammu ancuora é tiempi r'u carriettu co' trumma, ammiscannu tutti i cuosi a ttipu ri 'nsalata russa.
- Uncà cuomu! chista jeni 'a pruova lampanti ca viaggiannu si 'mpara siempi coccuosa, cu tanti 'nsalati chi ci sunnu cu l'avieva a diri ca cca avieva a pigghiari pieri chidda russa … puru picchì a sò tiempu fui 'ncarricata nna diligazioni p'apprienniri tutti i sicrieti 'nte paisi r'origini.
- Ciesiri … ma stai sdilliriannu o ti niscieru i siensij? cca stamu parrannu ri munnizza, pi favuri!! 'un pigghiamu arrieri 'stu capitulu picchì ri 'ssi cuosi cchiù picca si nni parra, miegghiu jè.
- 'A 'mprissioni mjà cchiùttuostu jeni cuomu siddu a vuautri ri 'sta 'nnuvazioni 'un vi nni futtissi nienti, siti cuomu tanti cifalutani parra parra, mmiriusi e siempi chi si lamientinu e puoi, 'n casu ca ci vinissi 'n tiesta quacchi pinsata, si fannu miettiri siempi 'a sputazza 'nto nasu r'i muntagnisi, e pi 'ssi tistuzzi c'aviti, v'u ricu jò, 'nvieci ri jri avanti, jamu siempi nn'arrieri nn'arrieri cuomu 'u curdaru 'nsina a quannu 'un faciemu 'a cuozzicatummula.
- Rricu, viri ca Nicuola u gn'è tantu cucivuli … 'un spara a ll'urbisca! 'sta vuota javi ragiuni, chiddu ri Buotta fa! e nna musca ncapu 'u nasu 'un s'a fà pusari … iddu si nn'addunò ca 'n sutta 'n sutta jeni nna pigghiata pi fissa, nne ca ti pari ca jeni Mruocju ca campava ammuccannu lavuornij!
- Puru jò haju 'stu prisintimientu, cuomu quannu fui r'a tiessira littruonica … puru tannu nni parsi un primatu assulutu! si nni parrò 'n tutta l'Italia; u vuliti sientiri tannu chi mi capitò? uncà si pò diri c'avieva furriatu mienzu munnu … 'nto mientri chi mi stava 'mbarcannu, a Lusanna, ò cicchinni ci sunò 'u campaniellu, 'mmagginativi chiddu chi succirjù … cuomu è tiempi ri teteschi, criritimi, mancu mi riettiru 'u tiempu r'arripigghiarimi r'u scantu ca m'atturniaru cuomu i lapuna; tantiannu tantiannu unu mi 'nfilò i manu 'nte sacchietti ri causi e v'agguanta giustu giustu 'ddu beddu cutieddu svizziru … sapiti, chiddu cu tutti 'ddi cusuzzi, ca cc'jeni puru 'u stuzzicarienti – 'un hannu cchiù chi cuosa sprumintari – e cu vitti cchiù puoi 'ddu beddu cutidduzzu! allura, unu si vuota: «mi favorisce un ducumento?» jò pigghiu e ci rugnu 'a tiessira littruonica. «Ha! ma lei è di Cefalù … che cittadina meravigliosa!!! la perla del Tirreno!!! sa, io e mia moglie non possiamo più farne a meno di questo luogo splendido e incantevole, davvero unico al mondo e ogni estate vi trascorriamo un lunghissimo periodo di indimenticabili vacanze» mi rici 'nturciuniannisi cuomu nna liama e, siempi cu 'ddu fari risulienti, cuntinua: «veda, questa tessera elettronica adottata da pochissimi Comuni in Italia, tra cui, appunto, Cefalù, denota l'elevatissimo grado di professionalità e di modernità acquisito dagli amministratori della vostra ridente cittadina e, pertanto, sento vivissimo il desiderio di esprimerle i migliori complimenti!! si può accomodare e mi consenta di augurarle un piacevolissimo viaggio di ritorno nella sua rinomatissima città di Cefalù». Mi sintiju acchianari tuttu 'u sangu 'n tiesta … addimintai russu cuomu un pipi, ca pi ll'arma c'à dari a Djò, 'nta 'ddu mumientu mi vinievinu jmpiti ri stimpagnariccilla 'nta facci … un minchiunieddu quassiasi chi pigghia pi fissa a mjà … 'u baruni ri Mantralisca! e ccu quali facci!! ma, puoi pinsai 'ntra ri mjà, nn'aviemu a fari canusciri siempi ca siemu cifalutani … e llassamu pierdiri rissi, tantu …!! 'nvieci, Nicuola, nnu vò riri chi jè 'sta nuvitati? ri chi si tratta? i paluori ti l'aviemu a tirari r'a vucca chi spinguli, cuomu i vavaluci!
- Rricu, ma tu criri ancuora ò scieccu chi vuola? ma stamu cugghiuniannu? 'un ti nn'adduni ri cuomu nni stannu pigghiannu arrieri pi minchiuna; 'ncà sintiti: jò uora, ri quannu mi livaru tutta 'dda mierda ri palummi ri 'n tiesta ca mancu putieva rapiri un uocchiu, puru chi si muovi nna musca 'n mienzu a ll'arbuli r'a Villa, jò a scuprisciu, ma jò paru cuomu siddu 'un ci fussi!! picchì 'u brunzu cu' tiempu avvirdica … no cuomu cierti facci!! 'un nni parramu … allura parissi ca sugnu mimitizzatu. E allura, sintiti: a don Nunziu, ca jeni tutta 'a jurnata assittatu 'nta banchina 'dda r'avanti faciennu una astuta e una adduma, ca quannu 'un c'è vientu pari un fussuni 'ncamucciatu r'allura, ci vinni nt'aricchi ca ò Municipiu ravinu rialata nna cuosa a speci ri tabbacchiera, pi sarbari i muzzuna ri sicarietti; 'ddu cristianu chi fici? subitu currjù p'apprufittari r'a cugnintura; fuma ca fuma, 'n tiempu ri nienti a jnchjù e 'un essiennuci scritta nudda struzioni r'aunni svacantarila fici arrietu un sautu ò Municipiu pi pigghiari 'nfurmazioni. «Signurina scusassi, virissi ca 'sta tabbacchiera si inchjù, m'u rici aunni l'à svacantari?» 'un viri chista! va truova chiddu chi cuosa ci avissi rittu! si vuota tutta allittrata e appirtanti e ci rici 'n talianu: «cosa vuole che le dica, io non ho avuto alcuna disposizione al riguardo … fumi di meno, solo questo le posso dire». 'Ddu cristianu, santu jera e diavulu addimintò: ma santu riavuluni ricu, cu tanti cuosi cchiù 'mpurtanti c'aviemu ri bisuognu, siempi jucari aviemu a fari?? pinsò 'ntra r'iddu, puoi si vuota, ma primu ri rapiri 'a vucca, 'dda signurina ci stimpagnò 'a puorta 'nta facci: «uora tu cuonzu jò 'u capizzu, mi l'avieva a 'mmaginari … cu 'ddu nasu pizzutu!» rissi 'ntra r'iddu … pigghiò e cci la sdivacò ddà r'avanti 'a puorta; mancu passò nna simana … u vuliti sapiri 'u risurtatu? nna matina 'un puottiru trasiri ò Municipiu, pi fuorza appiru a spunnari un passu cu nna ruspa cingulata! u vulistiru sientiri ò sinnicu … vuosi pagghia pi cientu cavaddi!! acchiappò 'dda fascia, s'a 'nfilò e partjù, ca a mumientu 'ddi scaluna s'i facieva a sciddicaculu: «cu fui chi chiamò 'sta ruspa? 'un aviemu cchiù mancu un cintiesimu 'n cassa, e allura? cu 'sti tabbacchieri faciemmu e 'un faciemmu nienti … siempi ò suolitu siemu!!»
'u tratturista cu' rumuri r'a ruspa 'un nni capjù nienti, si vuota cu' sinnicu: «signò sinnicu virissi ca 'a fascia s'a 'nfilò ra riviersa, 'u giummu và ri l'autru latu!». Allura … si taljò 'ntunnu 'ntunnu pi viriri si c'ierinu i suoliti futografi, puoi cu nna vrazzata, ca si sintiù cuomu nna speci ri frischiatina, sfurriò 'dda fascia e acchiappa p'un vrazzu a Piricuddu ca p'u fuorti spustamientu r'aria java ancuora cuomu un rruoggiu a piennula: «chiamimi a Sarba, ca 'dda bedda facciuzza 'sta vuota ci la fazzu avvirdicari jò!! 'un happi chi sprumintari! signuri mè … catina e catiniedda!! ma cu m'u fici faaaari??»
- Nicuola, finisti? ascuta, ascuta beddu pulitu … mi pari cuomu siddu r'a latata ri Missina sintissi truniari, o sunnu aricchi mè?
- Rricu, ma chi dici, ma quali truona … 'n cuntinuazioni … 'un si viri mancu un lampu e puoi 'un nnu sienti ca sunnu ncutti ncutti, viri ca 'un gn'è cuosa ri truona.
- Pippinu, tu ca sini ri 'ssa latata, jetta un sautu 'nto finistruni … và viri nzacchi sta succiriennu.
- Vuautri 'un v'aviti a scummarari mai … (Pippinu parti, rapi 'u finistruni a ngagghidda) «… ma santu riantanuni!! picchì puoi unu pierdi puru 'a pacienzia … javi mill'anni chi piniju e chi priericu p'attruvari nna banchiniedda, macari nica nica, aunni putiri attraccari e picca ci mancò ca 'sta vuota mi java a finiri cuomu a Culapisci s'un iera pi 'ddu zu Ninu, siempi rispunibili e vigilanti cu 'ddu vuzzarieddu …» (Pippinu 'ntrunò e cu ll'uocchi spitticchiati quantu 'u rui rinari … 'un ci parieva vieru … 'u re Ruggieeeru!!! ma cu l'avieva a ddiri!)
- Rricu, macari staju cu ddica, picchì 'un v'à vviri Pippinu chi fini fici, ma chi fici sdietti?
- Pippinu, ma chi sta succiriennu? Miii..!!! ragiuni avieva Nicuola, ma quali truona e truona …
- Jeni 'u re Ruggieru, 'un si po' ddari paci 'ddu puvurieddu, ca macari pari piatusu … e cu ci po' ddari tuor «… mancu cchiù rispiettu pi Giesù Sarbaturi, ricu: uora mi và sientu nna missa, mi fazzu a santa cumunioni … oh! trasu e mi carinu i vrazza!! … ru fimmini mienzi nuri addinucchiati 'nto cunfissiunali e patri Cuosciasicca, cu ddu uocchi cuomu ru funci picurini, chi ci javinu cca banna e dda banna … chi stava cunfissannu, 'un nn'à vviriri cchiù, aunni arrivammu! 'un c'jeni cchiù mancu nn'anticchia ri rispiettu pi nuddu! mi nni niscìju, mancu fici ru pirati … e cu vitti 'ddu fuossu! taliati cca … 'u viriti quantu l'haju vunciati? … cca, cca, 'u carcagnu e l'uossu pizziddu … aunni taliati?? e mienu mali ca c'jeni siempi pruontu Giesù Sarbaturi chi mi vuosi aiutari arrieri … 'un haju lingua pi putillu ringraziari … siddu nn'arridduciemmu ca 'un si pò gh'ittari cchiù un pieri a nuddi …»
- Pippinu, chiuri 'ssu finistruni, 'un ti far'avviriri, viri ca jò mi nni stà jennu, amuninni Pippinu … camina, amuninni … ascuta a mjà!!
- Uora viegnu, m'à vuogghiu sientiri tut «… e tu, chi fai affacciatiedda, si, si tu, scinni ca cci nn'è puru pi tjà … ca facisti ristruggiri mienzu castieddu pi fariccillu vorìri 'e pisci, scinni, scinni si hai curagg …» (Pippinu si vutò 'u stuomicu … aggialliò 'nta facci, si 'ncunigghiò e sienza pipitiari abbutò 'a parmiciana e ccu 'ddu matruni vutatu s'arricugghiù cchiù muortu ca vivu; ci parsi nn'affruntu, ma si l'agghiuttiù e 'un vuosi rari saziju a nuddu … si virieva pirò 'nta facci ca jera pi ddavieru un muzzicu ri vilienu).