Cu l'avieva a ddiri ca lu primu citatinu
avieva a rriscupriri l'impieru bizantinu
'un ci fuoru cunfini pi la suddisfazioni
p'aviri pusatu i pieri 'nta la fidirazioni
'nta tuttu lu Paisi 'un ci fui nna pirsuna
c'un ci parsi nautru sbarcu ncapu a luna
co ddiffirienza ca 'nto paccu strumintali
s'avieva stipatu milli prugietti culturali
s'apprisintò cuomu ra paci mbasciaturi
sienza culbaccu e cu la fascia triculuri
pi ssicurizza si mpaccò puru l'elmiettu
chi cartucci, i molotov e lu muschiettu
p'iddu 'un fari 'nsamai Djò la mala fini
cuomu ddi puvurieddi cicieni e ucraìni
a Musca pigghiaru accuordi pi scavari
e 'nta la Ruocca i bizantini pò attruvari
e si la chiusura ru Mantralisca jè vicinu
già aviemu pruontu lu museju bizantinu
un prugiettu chi fui fattu priestu priestu
primu chi vinissi dichiaratu lu rissiestu
ri 'nto Krimlinu tilicrafò cuomu r'usanza
appizzati priestu 'nta ll'albu st'urdinanza
“livatimi subitu la munnizza ri 'nte strati
ca stann'arrivannu i russi cu li carri armati”
'un ci fui maggiuranza e nnè uppusizioni
pi ffari 'n Cunsigghiu nna ditirminazioni
cuomu tanti fissa arristaru dda allampati
pi ccuomu puotti aviri 'sti ranni risurtati
uora co Supriema Cuorti jè 'n trattazioni
pi canciari cuomu 'nta Duma li dicisioni
accussì aggangannu chist'autru risurtatu
s'assicura a sieggia pi nn'autru mandatu.